കൃഷിചൊല്ലുകൾ (Krishi Chollukal)

ഒന്നു മുതൽ പത്തുവരെയുള്ള പാഠപുസ്തകങ്ങളിൽ കൃഷിയുമായി ബന്ധപ്പെട്ട പാഠഭാഗങ്ങൾ ഉണ്ട്. ഈ പാഠഭാഗങ്ങളിൽ കൃഷിയുമായി ബന്ധപ്പെടുത്തി കൃഷിചൊല്ലുകൾ ശേഖരിക്കാൻ ആവശ്യപ്പെടാറുണ്ട്. അങ്ങനെയുള്ള ശേഖരണങ്ങളിൽ ഉപയോഗിക്കുവാൻ കഴിയുന്ന കൃഷിച്ചൊല്ലുകൾ [100+] താഴെ നൽകിയിരിക്കുന്നു
ഉടമയുടെ കണ്ണ് ഒന്നാംതരം വളം.

---

കതിരിൽ വളം വച്ചിട്ടു കാര്യമില്ല!

---

അടയ്ക്കയായാൽ മടിയിൽ വയ്ക്കാം അടയ്ക്കാമരമായാലോ

---

അടുത്തുനട്ടാൽ അഴക്, അകലത്തിൽ നട്ടാൽ വിളവ്

---

അമരത്തടത്തിൽ തവള കരയണം

---

ആരിയൻ വിതച്ചാ നവര കൊയ്യാമോ

---

ആഴത്തിൽ ഉഴുതു അകലത്തിൽ നടണം

---

ആഴത്തിൽ ഉഴുത് അകലത്തിൽ വിതയ്ക്കുക

---

ഇടവംതൊട്ട് തുലാത്തോളം കുട കൂടാതിറങ്ങൊല്ല

---

ഇല്ലംനിറ വല്ലം നിറ പെട്ടി നിറ പത്തായം നിറ

---

ഉരിയരിക്കാരനു എന്നും ഉരിയരി തന്നെ

---

ഉഴവിൽ തന്നെ കള തീർക്കണം

---

എളിയവരും ഏത്തവാഴയും ചവിട്ടും തോറും തഴയ്ക്കും

---

എള്ളിന് ഉഴവ് ഏഴരച്ചാൽ

---

എള്ളുണങ്ങുന്ന കണ്ട് നെല്ലുണങ്ങണോ

---

എള്ളുണങ്ങുന്നതെണ്ണയ്ക്ക്, കുറുഞ്ചാത്തനുണങ്ങുന്നതോ?

---

ഒക്കത്തു വിത്തുണ്ടെങ്കിൽ തക്കത്തിൽ കൃഷിയിറക്കാം

---

ഒരു വിള വിതച്ചാൽ പലവിത്തു വിളയില്ല

---

കണ്ണീരിൽ വിളഞ്ഞ വിദ്യയും വെണ്ണീരിൽ വിളഞ്ഞ നെല്ലും

---

കണ്ടം വിറ്റു കാളയെ വാങ്ങുമോ

---

കന്നിയിൽ കരുതല പിടയും (കരുതല എന്നത് ഒരിനം മത്സ്യമാണ്)

---

കന്നൻ വാഴയുടെ ചുവട്ടിൽ പൂവൻ വാഴ കിളിർക്കുമൊ

---

കന്നില്ലാത്തവന് കണ്ണില്ല

---

കർക്കടകം കഴിഞ്ഞാൽ ദുർഘടം കഴിഞ്ഞു

---

കർക്കടകത്തിൽ പത്തില കഴിക്കണം

---

കർക്കിടക ഞാറ്റിൽ പട്ടിണി കിടന്നതു പുത്തിരി കഴിഞ്ഞാൽ മറക്കരുതു്‌

---

കർക്കിടകച്ചേന കട്ടിട്ടെങ്കിലും തിന്നണം

---

കല്ലാടും മുറ്റത്ത് നെല്ലാടില്ല

---

കളപറിക്കാത്ത വയലിൽ വിള കാണില്ല

---

കളപറിച്ചാൽ കളം നിറയും

---

കാറ്റുള്ളപ്പോൾ തൂറ്റണം

---

കാർത്തിക കഴിഞ്ഞാൽ മഴയില്ല

---

കാലം നോക്കി കൃഷി

---

കാലത്തേ വിതച്ചാൽ നേരത്തേ കൊയ്യാം

---

കാലവർഷം അകത്തും തുലാവർഷം പുറത്തും പെയ്യണം (തെങ്ങുമായി ബന്ധപ്പെട്ടത്)

---

കുംഭത്തിൽ കുടമുരുളും

---

കുംഭത്തിൽ കുടമെടുത്തു നന

---

കുംഭത്തിൽ നട്ടാൽ കുടയോളം, മീനത്തിൽ നട്ടാൽ മീൻകണ്ണോളം

---

കുംഭത്തിൽ മഴ പെയ്താൽ കുപ്പയിലും മാണിക്യം

---

കുംഭത്തിൽ മഴ പെയ്താൽ കുപ്പയിലും വിള

---

കൂര വിതച്ചാൽ പൊക്കാളിയാവില്ല

---

കൊന്ന പൂക്കുമ്പോൾ ഉറങ്ങിയാൽ മരുതു പൂക്കുമ്പോൾ പട്ടിണി

---

കൃഷി വർഷം പോലെ

---

ചേറ്റിൽ കൈകുത്തിയാൽ ചോറ്റിലും കൈ കുത്താം

---

ചോതികഴിഞ്ഞാൽ ചോദ്യമില്ല

---

ഞാറ്റിൽ പിഴച്ചാൽ ചോറ്റിൽ പിഴച്ചു